Matthew 5

Komnga Tila Oⱡa Mba Wamp Ik Mbo Inditim

1Jisas wamp num ni kandpa, elim komnga mong tila oⱡa mba murum. Elim nga kitip kᵾni wu ni kᵾⱡ, elim murum nila molk, pok elingina, puⱡ mondpa wamp nimbᵾ, ik mbo endpa nimba mel,

3“Got nga uⱡ mbᵾ nga kapⱡa iti natilinga, keⱡ rundi rundi mormin wamp mbᵾ, kai pileing. Got nga wamp tᵾpa mumuk rui kona ei, wamp mbᵾ nga, mᵾi kona uⱡ kit mbᵾ ndi elinga, mundmong mindil tᵾnmin wamp mbᵾ, kai pileing wamp mbᵾ, Got ndi, etpa numan wang ndumba!

5Numan koma tᵾi wamp mbᵾ, kai pileing, Got ndi, kela memp mᵾi nguimp nitim ei, en enim puⱡ puⱡ ralk ting!

6Got nga numan ngorum uⱡ mbᵾ, etamin ka nᵾk, kum pendᵾtmᵾn wamp mbᵾ kai pileing, numan ngᵾng uⱡ mbᵾ mel etpa, kapⱡa endangga!

7Wamp elpa mbᵾ kaimp kurmin wamp mbᵾ kai pileing, wamp kit kai kᵾmp ti ui ei kᵾn, Got ndi, wamp i etmin mbᵾ, kaimp koⱡmba!

8Numan kun kai pendpa, Got nga nimba pilim wamp ei kai pilangga! Wamp mbᵾ Got kᵾning.

9Wamp molk kundeing nᵾk, kongun etmin wamp mbᵾ kai pileing, wamp mbᵾ Got ndi, el elim nga kangambuⱡa nimba!

10Got nga numan ngorum uⱡ mbᵾ elingina, rok pep rok, rok pint panda etᵾk mek andinmin wamp mbᵾ, kai pilᵾi! Muⱡ kona tᵾpa mumuk rui kona ei, wamp mbᵾ nga!

11Enim na nga kitip kᵾni wamp kᵾⱡ, ui nant mat ila enim wamp kit nᵾk, rok pint panda etᵾk, tᵾk mbuldung oldung etᵾk, ik kit mbᵾ, we ndil ndil polk nᵾng wamp mbᵾ kai pilᵾi! Nambuⱡ ei mel, enim na pep rormin wamp kᵾⱡ. 12Enim numan kai pendᵾk, rui mᵾi nᵾk muⱡᵾi! Enim nga mel mam kai ti punt ropa ngumba ei, muⱡ kona ila tendpa morum. Enim mul nᵾmbil unt mbila, ik pai nomba ni, wu mat morung mbᵾ ei ku etᵾk, rok pint panda etᵾk, mek andrᵾng.

Ip Kuta Kᵾn Rᵾⱡang Ei Kᵾn

13“Enim Got nga wamp ya mᵾi kona wamp mbᵾ kᵾn, ip kuta mel, wote ip kuta ei nga tᵾngᵾn ei purpa wei ai em ndam, ip kuta ei nga tᵾngᵾn ei, etᵾp timin mel nant? Ip kuta purpa kit etᵾm ei, mundᵾk kelik mᵾi ila wamp mbᵾ ndi kambitmin.

14Enim, muⱡ uⱡ mbila wamp molk pᵾnmin mbᵾ nga rᵾⱡang mbᵾ. Manga rᵾⱡaip ti mek, komnga mong ila rakurmin ei nga rᵾⱡang ei, mou rui napᵾrᵾm ei mel kapⱡa. 15Wamp ti ndi, ndip lam kandpa, lam rᵾⱡang ei, panda ropa mundi namᵾndrᵾm mon. Wote lam kandᵾk, oⱡa nduk monduⱡina, manga ila mormin wamp ei, rᵾⱡang ngᵾⱡnga rᵾⱡang ei, kandᵾk mormin ei mel kapⱡa. 16Ei mel ku, enim nga rᵾⱡang ei, wamp mbᵾ nga kuimp keta ila rᵾⱡang pangga! Enim nga uⱡ kai eng mbᵾ, wamp mbᵾ ndi kandᵾk, enim nga Tipanᵾm Got wi muⱡ kona morum ei nga mbi ei, paka rundeing.

Jisas Ndi, Moses Nga Mi Ik Mbᵾ Mbo Inditim

17“Na ik mbo endᵾnt uⱡ ei nga, enim ndi, pilik pai nui wu mbᵾ nga ik niting na, Got nga mi ik Moses ngurum na mbᵾ, rop mbuⱡ mbaⱡ indimp nᵾmp, ur nᵾk pili nᵾpᵾlᵾi mon! Na rop mbuⱡ mbaⱡ indimp nᵾmp ui nᵾwᵾr mon. Na ik kᵾⱡ etᵾp, kupa indimp nᵾmp mana ur. 18Pilik muⱡᵾi! Ya akup moⱡᵾp onmᵾn ui ei, mba muⱡ mᵾi raⱡ pora nimba ei kᵾn, rᵾk ting ila, Moses nga mi ik ei nga, ik mong tenda kot kep, mᵾi ila uⱡ mbᵾ ndi, ropa kawa ndui nᵾndangga. Got nga ik ei ndi, etmba nitim uⱡ mbᵾ, etpa pora ndumba. 19Ei nga, wamp nam ti ndi, Got nga mi ik ei nga, ik mong onunga ti, tᵾpa pei mondrum uⱡ ei mel, wamp mat i ku iteing nimba, mbo endim ndam, wamp ei Got nga tᵾpa mumuk rui kona ila wamp nuim muⱡi nambuⱡmba. Wote, wamp nam ti ndi, mi ik ei, tᵾpa ou ndupa, wamp mat i ku etᵾk tᵾk, ou ndᵾi nimba mbo endim ndam, wamp ei, Got nga tᵾpa mumuk rui kona ila wamp nuim moⱡmba. 20Na enim kundᵾp namp, enim Moses nga mi ik mbo wu na, Perisi wu na mbᵾ, kun kai mormin uⱡ ei, tᵾk mana mel nduk, enim Got nga numan ngorum uⱡ mendpᵾⱡ mbᵾ mel, pep rok eng ndam, enim tᵾpa mumuk rui kona ila rukᵾr ping.

Popᵾⱡ Mundi Uⱡ Ei Nga Ik Mbo Inditim

21“Tᵾn nga anda kouwᵾmᵾn Jura wamp mbᵾ, man ngok, wamp rok kundi nᵾkᵾndᵾi nᵾtᵾm. Rom wamp ei, kombulk nangina mba, kupa em ndam, mong tangga. 22Ni kᵾn wote, akup na ndi, enim ik i etᵾp kondᵾp nᵾnt, wamp nam ti ndi, elim nga ᵾngᵾn ti kᵾn popᵾⱡ kuⱡᵾm ndam, wamp kᵾmp ti, wu ei nga kuimp keta ila mba anggilmba. Wamp nam ti ndi ᵾngᵾn ti nimba kit mondum ndam, ‘Nim ik ei mek puk, rᵾp wu,’ mbᵾ kᵾn, nᵾk mot ndᵾi! ‘Wamp nam ti ndi, elim nga ᵾngᵾn ei kundpa, nim kur kupᵾr wamp ti kant ei ka!’ nim ndam, nim wamp ei ndip kona ila mindil nomba. 23Wamp ti ndi, Got kᵾn rat pol wingti ila mel mat, wei gem nguimp nᵾkᵾn, oⱡa pukᵾn molkᵾn, wamp mbo ei kᵾn, ik puⱡ mat ropa mondpa nimba pilpa em ik ei, omba rondum pin ndam, nim nga wei gem ngᵾn mekᵾn mel ei, rat pol wingti ei nga kuimp keta ila tᵾkᵾn kelkᵾn, tᵾkrᵾk yant okᵾn, wamp mbo ei kᵾn, pem ik mbᵾ nᵾkᵾⱡ mᵾn mondkᵾⱡ kᵾn, yant okᵾn, wote Got wei gem nguin mekᵾn pun mel ei ngui.

25Wamp ti ndi, nim mepa kot indimp nim ndam, wamp ei kᵾn, ik puⱡ pem ei kot manga ila pi nᵾpi kᵾn, nombuⱡa paka ila unt nᵾk rotᵾk tᵾl muna, i iti natᵾkᵾⱡ, kot manga ila kun punggil ndam, nim tᵾpa wamp kᵾmp tᵾtᵾm wu ei kᵾn ngangga wu ei ndi, nim tᵾpa, el nde wu kᵾⱡ kᵾn ngangga, nim mek puk kan nguing. 26Ik kupa ei, nim kondᵾp nᵾnt, mel punt mat nim kᵾn petᵾm mbᵾ, punt rokᵾn pora ndun ndam, mint kan manga ei wak rokᵾn ekit pin,” nitim.

Wu Ti Nga Amp Ei, Tek Petmin Uⱡ Ei Nga Mbo Inditim

27Jisas ndi, nimba mel, “Tᵾn nga anda kouwᵾmᵾn mbᵾ ndi, Jura wamp mbᵾ, man ngok nitmin pᵾtmin ik ei, ‘Wu ti nga amp ei tek pi nᵾpᵾi,’ nᵾtmᵾn. 28Ni nga wote, akup ila na ndi, enim ik i etᵾp kundᵾp nᵾnt. Wu nam ti ndi, amp ti kandpa amp kant ei, tep pilmba ndam, pᵾp nimba pᵾtᵾm. Uⱡ ni ndi, mundmong ila amp ni, unt tepa pepa pora ndurum. 29Ei kᵾn, nim nga mong orunga ndi, nim etpa nit paka ila pendᵾm ndam, mong orunga polkᵾn tᵾkᵾn, rok mundᵾk kili! Kᵾng ei nga mel imp tenda ti ndi, etangga nim nga kᵾng kᵾⱡ pᵾkᵾ, ndip kona ila mba ei mon. Kᵾng ei nga em mel tenda ei, kᵾng ila muⱡi nambᵾⱡᵾm uⱡ ei kai. 30Muna, nim nga ki mbo orunga ndi, nim etpa nit paka ila pendᵾm ndam, koⱡmung etkᵾn mondᵾk kili! Ki tenda ei ndi, etangga nim nga kᵾng kᵾⱡ pᵾkᵾ, ndip kona ila mba ei mon. Em ki ei nga koⱡmung kopᵾt, ki ila muⱡi nambᵾⱡᵾm uⱡ ei kai!

Wu Amp Ndenggᵾⱡa Ni, Uⱡ Ei nga Mbo Inditim

31“Tᵾn nga anda kouwᵾmᵾn mbᵾ ndi, Jura wamp mbᵾ man ngok, ‘Wu nam ti ndi, elim nga ambᵾm ei, mondpa kelim ndam, amp ei akup mondᵾp kent nimba, wu amp ndenggᵾⱡa ndui pepa ti ropa ngangga.’ 32Ni nga wote, akup na ndi, enim ik i etᵾp kundᵾp nᵾnt, wu ti ndi, ambᵾm ei, wu elpa ti ndi, tepa pi nᵾpangga. Ik elpa tila nimba, oⱡa ndupa tepa ambᵾm mundpa kilangga, amp ei mba wu kont nga ti pum ndam, wu elpa tᵾpa tepa pei uⱡ ei nga mong ei, amp mundpa kelim wu ei tᵾmba. Wote, mundpa kelim amp ei, tᵾm wu ei, amp elpa tepa pei uⱡ ei nga mong ei tᵾmba.

Mi Ʉmbil Uⱡ Ei Nga Mbo Inditim

33“Tᵾn nga anda kouwᵾmᵾn mbᵾ ndi, Jura wamp mbᵾ man ngᵾk nᵾtᵾng petmin ei mel, ‘Nim nga mi tekᵾn itimp nin uⱡ ei, rokᵾn puⱡa rui nᵾri! Wote, nim nga Got ei kᵾn, mi tekᵾn itimp nin uⱡ ei mel etkᵾn kapⱡa indi.’ 34Ni nga wote, akup ila na ndi, enim i etᵾp kundᵾp nᵾnt, nim mi tekᵾn uⱡ ti itimp nᵾkᵾn pin ndam, kona ti mbi tekᵾn ni nᵾni! Wote ik ti nᵾmp ronduⱡ mundimp nᵾkᵾn, muⱡ kona ei mbi ti nᵾti! Nambuⱡ emel, muⱡ kona ei Got nga rᵾpndi pol ei, muna ya mᵾi ei mbi ti nᵾtᵾi! Ei nambuⱡ emel, ya mᵾi ei, Got nga kᵾmp raⱡ kambitim kona ei, muna Jerusalem mbi ti nᵾti! Nambuⱡ emel, Jerusalem ei, Got wu peng mumuk ei nga kona peng ei tetᵾm. 36Muna ik ti nimp ronduⱡ mundimp nᵾkᵾn, nim nga peng ombᵾl ei ᵾmbᵾⱡi nᵾmbᵾⱡi. Nambuⱡ emel, nim nga peng ombᵾl ei ambuⱡana. Nim nga peng ndi kot kep, pomp ndumba muna, kurᵾmᵾⱡa iti natᵾmba. 37Nim nga nin ik ei, kapⱡa nin ndam kep, mon nin ndam, ik tenda ei ni, merᵾng ik mat pendᵾp nᵾmp ronduⱡ mundimp nᵾkᵾn nin ndam, Seitan kᵾn orum ik mbᵾ nin.

Punt Ropa Ti Uⱡ Ei Nga Mbo Inditim

38“Tᵾn nga anda kouwᵾmᵾn mbᵾ ndi, man ngᵾk niting pᵾtmᵾn ei mel, ‘Wamp ti ndi, nim nga mong orunga ropa tᵾm ndam, mong elim nga mong ei rokᵾn ti ku, nim nga gu ei ropa randum ndam, elim nga gu ei ku rokᵾn rᵾngᵾn.’ 39Ni nga wote, akup ila na ndi, enim i etᵾp kundᵾp nᵾnt, wamp ti ndi, nim kᵾn uⱡ kit mat em kandkᵾn, ei mel ku etᵾp punt rop tamp nᵾkᵾn iti nᵾti! Wamp ti ndi, nim nga keng orunga ki ⱡurwa nde rom ndam, keng orunga nont ndana pendpa rangga! 40Wote, wamp ti ndi, nim nga wal pᵾki kel rukrᵾng orunga kᵾⱡ tᵾmp nimba, nim mepa kot endim ndam, nim nga wal pᵾki ekit orunga kᵾⱡ ngana pendpa tangga!

41Wamp ti ndi, pilkᵾⱡ ngumba, nim kona nundpa tila, pi nim ndam, nim ndi, oma kona roⱡ tila pi. 42Wamp ti ndi, nim mel ti waldᵾm ndam, waldᵾm mel ei ngui! Wamp ti nim nga mel ei mep mbo etᵾp, wote mep omp ngeimp nim ndam, wak rok ngana mepa etpa, wote mepa omba ngangga!

Nim Nga El Rui Wamp Mbᵾ Numan Ngui

43“Tᵾn nga anda kouwᵾmᵾn mbᵾ ndi, man ngᵾk nᵾtᵾng pᵾtmᵾn ei mel, ‘Nim numan ngᵾng wamp mbᵾ numan ngukᵾn, nim numan ngangᵾng wamp mbᵾ, numan ngui ngᵾngi,’ nitim. 44Ni nga wote, akup na ndi, enim i etᵾp kundᵾp nᵾnt, nim nga el rui wamp mbᵾ numan ngokᵾn, nim rok pint panda eng wamp mbᵾ, Got kᵾn atinga rundi. 45Uⱡ ei mel etangina, oⱡa muⱡ kona Wuta ei nga kangambuⱡa ralk muⱡeing. Oⱡa nuim ndi, wamp kit, kai mbᵾ kᵾn, ant tenda ei nga rᵾⱡang ei wamp mbᵾ kᵾn, ngumba kapⱡa endᵾtᵾm. Wote kona ndamᵾng ei, i ku etpa rangga nilinga, wamp kit kai mbᵾ mormin kona ila rorum. 46Ei kᵾn, nim numan ngᵾng wamp mbᵾ ku, numan ngᵾn ndam, wote Got ndi, nim namba tangga mel ti ngumba? Gapman nga ku moni takis tᵾndᵾtmin wu mbᵾ, uⱡ emel etmᵾn ei ka. 47Wote, nim nga wamp puⱡ na, wamp min na mbᵾ mint ik rungᵾndᵾn ndam, uⱡ ei mbo wamp mbᵾ kᵾn, uⱡ kont ti mon? Got kᵾn mondpa pili nᵾpili wamp mbᵾ, i ku etmᵾn. 48Ei kᵾn, nim nga oⱡa Wu Tipanᵾm ei, muⱡ kona ila kun kai morum ei mel, nim i ku etkᵾn, kun kai muⱡi!